Qarğa

MKİ-nin bir qrup satqın əməkdaşı böyük məbləğdə qazanc əldə etmək üçün sovet istehsalı olan 666 nömrəli deşifratoru ələ keçirib İrana satmaq qərarına gəlir. Məqsədə çatmaq üçün Bosniyaya Katsın rəhbərlik etdiyi xüsusi təyinatlı dəstə göndərilir. Əməliyyatdan sonra sağ qalan döyüşçülər arasında münaqişə yaranır: dinc sakinlərin qətlindən təngə gələn Martin komandadan ayrılmaq istəyir. Helikopterdə baş verən qarşıdurma zamanı pilot həlak olur, texnika isə cihazla birlikdə suya düşür.

Hadisədən bir il keçsə də, hər iki döyüşçü sağ qalmağı bacarır. Cihazın yalnız yarısına sahib olan və «Qarğa» ləqəbini daşıyan Kats kəşfiyyatçılardan digər hissəni tələb edir. Yarımçıq qurğunun heç bir işə yaramadığını bilən təcrübəli döyüşçü tələbi yerinə yetirilmədikdə xüsusi xidmət orqanının əməkdaşlarını bir-bir məhv etməyə başlayır.

«Qarğa» filmi 1996-cı ildə ABŞ-da rejissor Rassel Solberq tərəfindən çəkilib. Döyüş janrında olan bu ekran əsərində əsas rolları Avalon Anders, Culi Edeyr, Mayk Uayt və Morqan Siqal canlandırıb.