Troma's War

Tromavil şəhərindən havaya qalxan sərnişin təyyarəsi Kubanın yaxınlığındakı kimsəsiz adanın sahilində qəzaya uğrayır. Hadisədən sonra sağ qalanların sayı iyirmi nəfərdən az olur. Quruya çıxan insanlar çox keçmədən bu ərazinin göründüyü kimi sakit olmadığını anlayırlar.

Təcrid olunmuş bu məkanda dünyanın müxtəlif yerlərindən gələn terrorçuların təlim düşərgəsi yerləşir. Onların məqsədi xüsusi hazırlıq keçərək ABŞ-a getmək və orada xaos yaratmaqdır. Lakin qəzadan xilas olan adi vətəndaşlar təslim olmaq fikrində deyillər və həm öz həyatlarını, həm də ölkələrini qorumaq üçün mübarizəyə başlayırlar.

«Troma's War» filmi 1988-ci ildə ABŞ-da rejissorlar Lloyd Kaufman və Maykl Herts tərəfindən çəkilib. Döyüş, macəra və qorxu elementlərini birləşdirən ekran əsərində Bert Rayt, Rik Kollinz, Patrik Uevers və Susan Baxli kimi aktyorlar rol alıb.