İlan yeyən 2: Narkotiklərlə mübarizə

«Snake Eater II: The Drug Buster» döyüş filmi «Əsgər» ləqəbli Cek Kellinin yeni mübarizəsindən bəhs edir. Şəhərdə gənclərin kütləvi ölümünə səbəb olan siçan zəhəri qatılmış kokain partiyası yayılanda Cek cinayətkarlara qarşı təkbaşına hərəkətə keçir. O, əlinə silah alaraq yerli narkomafiyanın rəhbərlərini bir-bir aradan qaldırır.

Özbaşına cəza tədbirlərini bəyənməyən məhkəmə onu psixiatriya xəstəxanasında məcburi müayinəyə göndərir. Lakin xəstəxananın divarları Ceki saxlaya bilmir: o, gecələr gizlicə qaçaraq şəhəri zəhərləyən narkotik alverçilərini məhv etməyə davam edir.

1989-cu il Kanada istehsalı olan ekran əsərinin rejissoru Corc Erşbeymerdir. Əsas rollarda Cek Blum, Felisiya Şulman, Erik Hoziel və Harvi Etkin çəkiliblər.