Amerikan kiborqu: Polad döyüşçü

Dağıdıcı nüvə müharibəsindən on yeddi il sonra sağ qalan bəşəriyyət süni zəkaya malik kompüter Sisteminin əsirinə çevrilib. Artıq nəsil artıra bilməyən insanlar Sistemi qoruyan amansız kiborqların ciddi nəzarəti altında yavaş-yavaş məhvə doğru gedirlər.

Qiyamçılar nəsli davam etdirmək qabiliyyətinə malik olan yeganə sağlam qadını taparaq onu Avropaya göndərmək üçün limana aparmağı planlaşdırırlar. Lakin limana aparan yol heç də asan deyil: qəhrəmanlar şəhərin küçələrini bürümüş kannibal qruplaşmalarının və amansız kiborqların təqiblərindən qorunmalıdırlar.

1993-cü il istehsalı olan «American Cyborg: Steel Warrior» filmi fantastika və döyüş janrında çəkilib. ABŞ istehsalı olan bu ekran əsərinin rejissoru Boaz Devidsondur, baş rollarda isə Con Seynt Rayan, Uri Qavriel, Yossi Şilloax və Helen Lesnik çıxış edir.