Cəhənnəmdən gələn alov

Kentukki ştatındakı sakit bir qəsəbədən zəhərli tullantıların basdırılması barədə gizli məlumatlar daxil olur. Xüsusi agent Cek Taqqert vəziyyəti aydınlaşdırmaq üçün bölgəyə yollanır. Ondan əvvəl eyni tapşırıqla gələn dostu yerli polisin iddiasına görə qəzada ölüb. Tezliklə məlum olur ki, həmin ərazidə daha bir neçə FTB əməkdaşı müəmmalı şəkildə həyatını itirib.

Bu torpaqlarda zəngin təbiəti məhv edən və tonlarla təhlükəli kimyəvi maddə saxlayan yerli maqnat və onun adamları hökmranlıq edir. Sakinlər qorxu içindədir, məmurlar ələ alınıb, təbiəti mühafizə müfəttişi isə aradan qaldırılıb. «Fire Down Below» filmində Cek Taqqert təkbaşına ədaləti bərpa etməyə çalışır.

ABŞ istehsalı olan trilleri rejissor Feliks Enrikes Alkala çəkib və ekran əsəri 1997-ci ildə nümayiş olunub. Baş rolları Stiven Siqal, Skott L. Şvarts, Nyuell Aleksandr və Ellaraino canlandırıb.