Malyorkalı adam

Dekabrın 13-də Stokholmun mərkəzindəki poçt şöbələrindən birinə silahlı basqın edilir. Orta yaşlı naməlum şəxs təxminən dörd yüz min kron aparmağı bacarır və hadisə yerinə birinci çatan əməliyyatçılar Yarnebrinq ilə Yohanssonun əlindən qaçır. İşin rəhbərliyi komissar Dalqrenə tapşırılır və hər iki polis də axtarışlara cəlb olunur.

İstintaq ipuclarının azlığı səbəbindən ləng getsə də, qısa müddət sonra hadisə şahidləri bir-bir həyatını itirməyə başlayır. Bir-biri ilə heç bir əlaqəsi olmayan insanların ölümü vəziyyəti daha da qəlizləşdirir. İki polis əməkdaşı cinayətkarı ifşa etmək üçün var gücü ilə çalışarkən naməlum qüvvələrin maneələri ilə qarşılaşırlar.

«Malyorkalı adam» filmi 1984-cü ildə rejissor Bu Viderberq tərəfindən çəkilib. İsveç və Danimarka istehsalı olan bu cinayət trillerində baş rolları Tommi Conson, Tomas fon Brömssen, Marqret Veyvers və Karl-Olof Alm ifa edirlər.