Kosmik ovçu: Qadağan olunmuş zonada macəralar

Uzaq gələcəkdə sərnişin laynerinin qəzaya uğraması nəticəsində yalnız üç qız sağ qalmağı bacarır. Onlar partlayışdan bir qədər əvvəl xilasedici kapsulla gəmini tərk edir və aparatın avtomatik sistemi onları atmosferi Yerə bənzəyən Terra-11 planetinə endirir. Baş verən hadisə və sağ qalanlar barədə xəbəri kosmik ovçu Vulf eşidir.

Məlumatları araşdıran Vulf öyrənir ki, bu planetin əhalisi uzun illər taun epidemiyasından əziyyət çəkib, ora göndərilən həkimlər xəstəliyin qarşısını ala bilməyib və məkan qadağan olunmuş zona elan edilib. Təhlükəli yerə yollanmaq barədə tərəddüd etsə də, xilas ediləcək qızlara görə vəd olunan böyük məbləğ ovçunu hərəkətə keçməyə vadar edir.

1983-cü il istehsalı olan «Spacehunter: Adventures in the Forbidden Zone» macəra filmi ABŞ və Kanada tərəfindən ərsəyə gətirilib. Ekran əsərinin rejissoru Lemont Consondur, əsas rolları isə Debora Prett, Harold Reymis, Reqqi Bennett və Kali Timmins canlandırıb.