Himayəçi

Nyu-Yorkda keçirilən dəb nümayişi zamanı bir milyonçunun qızı qaçırılır. Həmin gecə tədbirdə polis əməkdaşı Billi Von mühafizəçi kimi çalışırdı. Xasiyyətinin həddindən artıq çılğın olmasına görə o, bu ərəfədə əsas xidmətindən uzaqlaşdırılmış vəziyyətdə idi.

Vəzifəsindən kənarlaşdırılmasına baxmayaraq, qızı xilas etmək məhz bu qanun keşikçisinin üzərinə düşür. O, cinayətkarların arxasınca düşərək Nyu-Yorku tərk edir və axtarışları davam etdirmək üçün Honkonqa yola düşür.

1985-ci ildə ekranlara çıxan «Himayəçi» döyüş filmi ABŞ və Honkonqun birgə istehsalıdır. Filmin rejissoru Ceyms Qlikenhauz, əsas rolların ifaçıları isə Pol L. Smit, Ronan O’Keysi, Şum Vay və Mun Lidir.