Nyu-York taksisi

Bell Vilyams Nyu-York küçələrində hər kəsdən sürətli sürən bacarıqlı taksi sürücüsüdür. Öz avtomobilini xüsusi şəkildə təkmilləşdirən qadın peşəkar yarışlarda qalib gəlmək arzusundadır. Lakin onun bu planları maşın sürməkdə tamamilə bacarıqsız olan və sürücülük vəsiqəsini itirən polis əməkdaşı Endi Uoşborn ilə rastlaşdıqdan sonra təxirə düşür.

Polis detektivi soyuqqanlı Vanessa tərəfindən idarə olunan və bankları qarət edən qadın qruplaşmasını təqib edir. Şəxsi maşını olmayan Endi cinayətkarları yaxalamaq üçün Bellin köməyindən yararlanmağa qərar verir və ona yollarda istənilən sürətlə hərəkət etmək azadlığı verir. Fərqli xarakterə malik bu cütlük təhlükəli soyğunçuların izinə düşərək küçələrdə çətin bir yarışa başlayır.

«Nyu-York taksisi» cinayət komediyasını rejissor Tim Stori çəkib. ABŞ və Fransanın birgə istehsalı olan bu film 2004-cü ildə təqdim edilib. Rollarda Adam LeFevr, Con Farrer, Con Rotmen və Con Erik Braun yer alıblar.