Zom 100: Zombi Apokalipsisi və Ölməzdən Əvvəl Görüləcək 100 İş

Akira ixtisası üzrə ofisdə iş tapanda sevinci yerə-göyə sığmırdı, lakin bu həvəs ilk iş gününün axşamınadək davam etdi. Rəhbərin amansız tələbləri, bitib-tükənməyən artıq iş saatları və evdə sadəcə yatmağa belə vaxtın qalmaması gənci tamamilə taqətdən saldı. Bir il bu rejimdə yaşayaraq canlı meyitə dönən Akira intihar etmək barədə düşündüyü ərəfədə Tokio şəhərini gözlənilmədən əsl zombi epidemiyası bürüyür.

Bu fəlakət Akira üçün gözlənilməz bir qurtuluşa çevrilir, çünki artıq nifrət etdiyi ofisə getmək məcburiyyəti aradan qalxır. Şəhərdə xaos hökm sürərkən azadlığın dadını çıxaran gənc dərhal bir siyahı tərtib edir. O, həyatı sona çatmazdan əvvəl reallaşdırmaq istədiyi yüz arzusunu qeyd edərək onları bir-bir həyata keçirməyə başlayır.

2023-cü ildə işıq üzü görən «Zom 100: Bucket List of the Dead» adlı qorxu və komediya filminin rejissoru Yusuke Ishidadır. Yaponiyada istehsal olunmuş bu döyüş elementli ekran əsərində baş rolları Mayo Kawasaki, Fumiya Ogura, Yo Takahashi və Seijun Nobukawa canlandırıb.