Ölüm şossesi

Həyat yoldaşının qətlə yetirilməsi Renni Kreyin taleyini büsbütün dəyişir. Ailəsini əlindən alan qəddar cinayətkarı cəzalandırmaq istəyən Krey illərini bu qatilin axtarışına həsr edir. İntiqam almaq onun üçün yeganə yaşamaq məqsədinə çevrilir.

Cinayətkar isə 1972-ci il istehsalı olan köhnə «El Dorado» markalı avtomobili ilə kimsəsiz gecə yollarında yeni qurbanlar ovlamağa davam edir. Onun hədəfi gənc qadınlar olur. Nəhayət, qatilin izinə düşən Renni onu tələyə salmaq üçün manyakın növbəti hədəf seçdiyi qızdan canlı yem kimi istifadə etməyi qərara alır.

«Ölüm şossesi» (Highwaymen) filmi döyüş, triller, cinayət və qorxu janrlarını özündə birləşdirir. ABŞ və Kanada istehsalı olan bu ekran əsəri 2003-cü ildə rejissor Robert Harmon tərəfindən çəkilib. Baş rollarda Cim Kevizel, Kolm Fior, Co Pinq və Ron Bell çıxış edirlər.