Cəhənnəm ziyafəti

Balaca bir şəhərin yuxarı sinif şagirdləri səbirsizliklə məzuniyyət gecəsini gözləyirlər. Bəziləri bu şənliyə cütlüklə getməyə hazırlaşır, dəvət etməyə heç kimi olmayanlar isə tədbirə tamamilə laqeyd kimi görünməyə çalışırlar. Lakin yerli qəbiristanlıq işçisindən başqa heç kim bilmir ki, yaxınlıqdakı elektrik stansiyasından havaya yayılan tullantılar bir neçə gündür ölüləri məzarlarından qaldırır.

Axşam saatlarında zombi ordusu qəbirlərdən çıxaraq məktəbə doğru irəliləyir və şənlik gözlənilməz bir fəlakətə çevrilir. Əylənməyə toplaşan gənclər sağ qalmaq üçün aralarındakı inciklikləri unudub bu dəhşətli təhlükəyə qarşı mübarizə aparmalı olurlar. Məzuniyyət balı qanlı və unudulmaz bir döyüş meydanına dönür.

«Cəhənnəm ziyafəti» (Dance of the Dead) komediya və qorxu janrında çəkilmiş ABŞ filmidir. Rejissor Qreqq Bişop tərəfindən lentə alınan ekran əsəri 2008-ci ildə işıq üzü görüb. Baş rolları Mark Linç, Qreyson Çadvik, Karissa Kapobyanko və Laura Uiggins canlandırıblar.