Belly of the Beast

Hadisələri Tailandda cərəyan edən «Belly of the Beast» döyüş filmi iki amerikalı qızın radikal qruplaşma tərəfindən girov götürülməsindən bəhs edir. Əsir düşənlərdən biri Cessika Hopper, digəri isə nüfuzlu senatorun qızıdır. Cinayətkarlar tələblərini irəli sürərək əks halda qızları öldürəcəklərini bildirirlər.

Cessikanın atası, keçmiş MKİ əməkdaşı və döyüş sənətləri ustası Ceyk Hopper kömək gözləmədən qızını xilas etmək qərarına gəlir. O, sadiq həmkarı ilə birlikdə terrorçulara qarşı təhlükəli mübarizəyə başlayır. Tezliklə bu xilasetmə əməliyyatı onları xəyanətlər və qədim şərq mistikasının iç-içə keçdiyi mürəkkəb bir sui-qəsdin içinə sürükləyir.

Rejissoru Toni Çin olan film ABŞ, Böyük Britaniya, Kanada, Tailand və Honkonq tərəfindən 2003-cü ildə istehsal edilib. Baş rolları Stiven Siqal, Martin MakDuqall, İen Robison və Maks Raddok canlandırıblar.