Skylin3s

Yadplanetlilərin Yer kürəsinə hücumundan on beş il ötür. İnsanlar və dost yadplanetli hibridlərin birgə dinc həyatı qəfildən yayılan naməlum virus səbəbindən təhlükə altına düşür. Ulduz gəmisində dünyaya gələn mutant Rouz Korli öz odlu qolunu idarə etməkdə çətinlik çəksə də, müqavimət hərəkatının üzvləri məhz ondan kömək istəyir.

Döyüşçülər Rouza xüsusi hazırlıq keçmiş dəstənin tərkibində düşmən planetinə yollanmağı təklif edirlər. Bu təhlükəli missiyada qıza yadplanetli qardaşı Trent də yoldaşlıq edir. Onların əsas hədəfi qəzaya uğramış yadplanetli gəmisinin nüvəsini ələ keçirərək bəşəriyyəti xilas etməkdir.

«Skylin3s» fantastik döyüş filminin rejissoru Liam O'Donnelldir. 2020-ci il istehsalı olan layihə ABŞ, İspaniya, Böyük Britaniya, Fransa və Litva kinematoqrafçılarının birgə əməyi ilə ərsəyə gəlib. Əsas obrazları Aleksandr Siddiq, Toni Blek, Conatan Hovard və Ceyms Kosmo canlandırıb.