Eşq

Acay və Madhu varlı ailələrin övladlarıdır və valideynləri onları ancaq özləri kimi zəngin təbəqədən olan insanlarla evləndirmək niyyətindədir. Digər tərəfdən isə kasıb avtomexanik Raca və aztəminatlı ailədən olan Kacol tamamilə fərqli bir həyat sürürlər. Lakin gənclərin hissləri valideynlərinin qurduğu bu planlara uyğun gəlmir.

Varlı Acay kasıb Kacola könül verir, Madhu isə sadə mexanik Racaya aşiq olur. Gənclər ailələrinə öz qərarlarını bildirən kimi valideynlər bu münasibətlərin qarşısını almaq üçün dərhal hərəkətə keçirlər. Böyüklər sosial bərabərsizliyi əsas gətirərək cütlükləri ayırmaq üçün müxtəlif yollara əl atırlar.

1997-ci ildə Hindistanda istehsal olunmuş «Ishq» filminin rejissoru İndra Kumardır. Əsas rolları Aamir Xan, Acay Devqan, Cuhi Çavla və Kacol canlandırıblar. Ekran işi komediya, dram, melodram və musiqili film janrlarını özündə birləşdirir.