Əjdahanın yolu

Tan ailə dostlarına kömək etmək məqsədilə Honq Konqdan Romaya gəlir. İtaliyadakı bu restoranı yerli cinayətkar qruplaşma ələ keçirmək istəyir. İstədiklərinə asanlıqla nail olmağa öyrəşmiş mafiya üzvləri sakit görünüşlü bu gənci lazımınca qiymətləndirməyərək böyük səhvə yol verirlər.

Tana qarşı təkbaşına gücləri çatmayan quldurlar Avropa və Yaponiyadan ən bacarıqlı döyüş ustalarını muzdla tuturlar. Lakin Tan bu rəqiblərin hamısını asanlıqla məğlub edir. Mafiya çıxış yolunu qəddar amerikalı döyüşçü Koltu çağırmaqda görür və onlar qədim Kolizey arenasında üz-üzə gəlirlər.

«Əjdahanın yolu» (Return of the Dragon) döyüş filmi 1972-ci ildə Honq Konqda çəkilib. Filmin rejissoru baş rolu da ifa edən Brüs Lidir. Ekran əsərində həmçinin Nora Myao, Çak Norris və Vey Pinqao çəkiliblər.