Milyardlıq fidyə

Varlı ailələr ərköyün övladlarını tərbiyələndirmək və onlara məsuliyyət hissi aşılamaq üçün ucqar bir adada yerləşən xüsusi düşərgəyə göndərirlər. Valideynlər bu təcridin gənclərə müsbət təsir edəcəyini düşünürlər. Lakin adaya silahlı cinayətkarlar dəstəsi soxulduqda dinc planlar yarımçıq qalır.

Basqınçıların məqsədi elit təbəqənin varislərini girov götürərək onlara görə bir milyard dollar fidyə tələb etməkdir. Təhlükə ilə üz-üzə qalan gənclər soyuqqanlı təcavüzkarlara müqavimət göstərmək üçün təbiətdə sağ qalma təlimlərində öyrəndikləri vərdişlərdən istifadə etməli olurlar.

«Take Down» adlı Britaniya istehsalı olan bu döyüş və triller filmini rejissor Cim Qillespi lentə alıb. 2016-cı ilin ekran işində əsas rolları Ed Vestvik, Mark Bonnar, Leon Li və Martin MakDuqall canlandırıblar.