Şikar

1719-cu ildə Şimali Amerikanın Böyük Düzənliklərində komançi qəbiləsindən olan Naru adlı gənc qız mahir ovçu kimi qəbul olunmaq istəyir. Lakin yaxınları onun bu bacarığına ciddi yanaşmırlar. Dağ şirininin hücumuna məruz qalan soydaşını axtarmağa gedən dəstəyə qoşulan Naru meşədə qəribə izlər aşkar edir.

Vəhşi pişiklə toqquşmada uğursuzluğa düçar olan və qardaşının ən yaxşı ovçu seçilməsi ilə razılaşmayan Naru həmin qeyri-adi canlının izinə təkbaşına düşməyə qərar verir. Qız hələ bilmir ki, onun ovlamaq istədiyi varlıq Yer kürəsinə güclü rəqib tapmaq üçün gəlmiş yüksək texnologiyalı yadplanetlidir.

ABŞ istehsalı olan «Şikar» («Prey») elmi-fantastik döyüş filmi Den Traxtenberq tərəfindən lentə alınıb. 2022-ci ildə nümayiş olunan bu ekran əsəri məşhur «Yırtıcı» franşizasının bir hissəsidir. Baş rolları Ember Midfander, Kayl Lecir, Troy Möndle və Culian Şemp canlandırıblar.