Qaynar xəbərlər

Soyğunçularla baş verən atışma asayiş keşikçiləri üçün böyük bir rüsvayçılıqla nəticələnir. Cinayətkarlar hadisə yerindən qaçmağı bacarır, müxbirlər isə bir polisin canını qurtarmaq üçün yalvardığı anları kameraya çəkir. Yayımlanan bu kadrlar polisin cəmiyyətdəki nüfuzuna ciddi zərbə vurur.

İctimaiyyət qarşısında itirilmiş etimadı bərpa etmək istəyən rəhbərlik genişmiqyaslı piar kampaniyasına əl atır. Qaçaqlar yaşayış binasında gizlənərkən xüsusi təyinatlıların üzərinə mini-kameralar bərkidilir. Beləliklə, binaya hücum əməliyyatını televiziya vasitəsilə canlı yayımda göstərmək qərara alınır.

2004-cü ildə çəkilmiş «Qaynar xəbərlər» (Daai si gin) kriminal döyüş filminin rejissoru Conni Todur. Honkonq istehsalı olan layihədə əsas rolları Pakmen Vonq, Li Haytao, Fanni Li və Eddi Çun canlandırıb.