Redirected

Maykl, Conni, Ben və Tim adlı dörd londonlu dost qeyri-qanuni fəaliyyət göstərən kazinonu qarət edirlər. Əllərindəki pulla birlikdə Malayziyaya qaçmağı planlaşdıran qrup dərhal təyyarəyə minir. Lakin Eyyafyadlayöküdl vulkanının qəfil püskürməsi hava reysinin marşrutunu dəyişir və təyyarə Vilnüsdə eniş etməli olur.

Litva torpağına qədəm qoyan ingilislər burada yerli mühitlə və müxtəlif problemlərlə üzləşirlər. Eyni zamanda, qarət olunmuş kazinonun intiqam almaq istəyən sahibi də oğruların izinə düşərək onların arxasınca gəlir.

«Redirected» kriminal komediya filmi litvalı rejissor Emilis Velivis tərəfindən çəkilib. Böyük Britaniya və Litvanın ortaq istehsalı olan bu 2014-cü il filmində rolları Skot Uilyams, Dayva Yovayşene, Vitautas Şapranauskas və Donatas Şimukauskas canlandırıb.