Vəzir

Antiterror dəstəsinin zabiti Daniş Əlinin xoşbəxt ailə həyatı terrorçuların təqibi zamanı dördyaşlı qızının qətlə yetirilməsi ilə alt-üst olur. Ağır itkini yaşamağa çalışan zabit özü kimi övlad dərdi çəkən keçmiş şahmat qrosmeysteri Panditci ilə tanış olur.

Qoca şahmatçı Danişi kədərdən uzaqlaşdırmaq üçün ona şahmat oynamağı öyrədir və qızı Ninanın müəmmalı ölümü barədə danışır. O, qızının qətlində sosial rifah naziri İzad Qureşidən şübhələnir. Panditciyə qarşı «Vəzir» adlı naməlum şəxs tərəfindən hücum ediləndə, Daniş bu sirli fiqurun kimliyini və Ninanın ölümündəki müəmmaları təkbaşına araşdırmağa başlayır.

Hindistan istehsalı olan «Vəzir» trillerinin rejissoru Becoy Nambiardır. 2016-cı ildə çəkilmiş dram janrlı bu filmdə baş rolları Amitabh Baççan, Ancum Şarma, Aditi Rao Hidari və Prakaş Belavadi canlandırıb.