Soyuqqanlı

Qanunsuz mərclər qəbul edən Kozmo mafiya rəhbərinin qərarı ilə qəfil muzdlu qatil vəzifəsinə keçirilir. Yüksək gəlir və bol asudə vaxt vəd edən bu yeni iş onu sevindirməsə də, cinayətkar qruplaşmaya qarşı çıxmaq mümkün deyil. Beləliklə, o, Stiv adlı təcrübəli qatilin yanında təlim keçməyə məcbur olur.

Qısa müddətdə Kozmonun hər iki əli ilə hədəfi dəqiq vurduğu və ildırım sürəti ilə reaksiya verdiyi üzə çıxır. Lakin bir müddət sonra vicdan əzabı və sevgilisinin bu peşəyə mənfi münasibəti onun qarşısını kəsir. Mafiya sıralarından isə sadəcə öz istəyinlə ayrılmaq heç vaxt asan olmur.

ABŞ istehsalı olan «Coldblooded» filmi 1995-ci ildə ekranlara çıxıb. Rejissor Uolles Volodarskinin lentə aldığı bu layihədə əsas rolları Ceyson Pristli, Robert Loca, Maykl C. Foks və Cey Koqen canlandırıblar.