Yaradan

Süni intellektin səbəb olduğu Los-Ancelesdəki nüvə partlayışından sonra Qərb ölkələri maşınlara qarşı barışmaz müharibəyə başlayır. Lakin robotlarla yanaşı yaşamağı seçən Yeni Asiya bölgəsi bu mövqeyi qəbul etmir. İllər öncə gizli tapşırıqla ora göndərilən xüsusi təyinatlı Coşua süni intellektin müəllifi Nirmata ləqəbli alimi tapmalı idi. O, yerli alim Maya ilə ailə qurub uşaq gözləsə də, NOMAD adlı orbital stansiyanın endirdiyi zərbə zamanı həyat yoldaşını itirir.

Aradan beş il keçdikdən sonra Coşuanı yenidən xidmətə cəlb edirlər. Kəşfiyyatın məlumatına görə, Nirmata NOMAD stansiyasını məhv etməyə qadir yeni gizli silah hazırlayıb. Coşua laboratoriyanı aşkar etmək üçün yenidən Yeni Asiya torpaqlarına qayıtmalı olur.

Rejissor Qaret Edvards tərəfindən çəkilən «Yaradan» filmi 2023-cü ildə təqdim olunub. ABŞ istehsalı olan bu fantastik ekran əsərində baş rolları Con Devid Vaşinqton, Veronika Nqo, Sahatçay Çumrum və Ceb Kriqer canlandırıb.