Bərpa nöqtəsi

2041-ci ildə Mərkəzi Avropada kəskin sosial bərabərsizlik cinayətkarlığın artmasına gətirib çıxarır. Dövlət çıxış yolu kimi qətlə yetirilən vətəndaşlara dirilmək hüququ verir: bunun üçün insanın son 48 saat ərzində hazırlanmış rəqəmsal nüsxəsi tələb olunur. Bərpa İnstitutunun yaratdığı bu sistemə qarşı çıxan «Həyat çayı» adlı radikal qrup isə kütləvi qurbanlarla nəticələnən terror aktları törətməyə başlayır.

«Bod obnovy» detektiv filmində müstəntiq Em Troxinofska mürəkkəb bir cinayət yerinə yollanır. Hadisə yerində institutun aparıcı alimi David Kurlstat və xanımının meyitləri tapılır. Ən qəribə məqam odur ki, dirilmə texnologiyasına rəhbərlik edən alimin və yoldaşının heç bir ehtiyat nüsxəsi mövcud deyil.

2023-cü il istehsalı olan bu filmin rejissoru Robert Qlozdur. Çexiya, Polşa, Serbiya və Slovakiya kinematoqrafçılarının birgə ərsəyə gətirdiyi layihədə baş rolları Giya Berns, Katajina Zavadzka, Tereza Rixtrova və Vatslav Neujil canlandırıb.