Eskimosların yaşadığı yerə

1995-ci ildə Bosniya müharibəsinin qızğın çağında Şarki adlı bir nəfər özünü YUNİSEF əməkdaşı kimi təqdim edir. Onun ölkədən yalnız bir kimsəsiz uşağı çıxarmaq hüququ var. Doqquzyaşlı Vlado Petriç xəstə dostu Şmayanı tərk etmək və ya bu yadelli adama güvənib eskimosların yaşadığına inandığı Norveçə yollanmaq arasında seçim etməli olur.

Uşaq xəyallarına inanaraq yola çıxsa da, sərhədə yaxınlaşdıqca yoldaşının əslində heç bir humanitar təşkilatla əlaqəsi olmayan bir fırıldaqçı olduğundan şübhələnir. Aldanışa, incikliklərə və mübahisələrə baxmayaraq, pul hərisliyi ilə hərəkət edən yadelli ilə müharibə uşağı arasında tədricən möhkəm bağlar yaranır.

«Eskimosların yaşadığı yerə» dram filmi 2001-ci ildə rejissor Tomaş Vişnevski tərəfindən çəkilib. ABŞ, Böyük Britaniya, Polşa və Almaniyanın birgə istehsalı olan bu ekran əsərində baş rolları Bob Hoskins və Sergiuş Zimelka canlandırıb.