Supermarketdə Çiyələk

Belqrad yaxınlığındakı qəsəbədə parıltılı vitrinləri və bol çeşidi olan Amerika tipli yeni supermarket fəaliyyətə başlayır. Şəxsi həyatında tənha qalan və xəyallarında ideal sevgili axtaran Yaqoda burada kassir işləməyə başlayır. İş gününün sonunda o, nəvəsinə tort bişirmək üçün ərzaq almağa gələn yaşlı qadına qapını göstərib xidmət göstərməkdən imtina edir.

Ertəsi gün supermarketə təpədən-dırnağadək silahlanmış bir nəfər hücum edir, içəridəkiləri girov götürür və binanı minalayır. Çox keçmədən aydın olur ki, bu hücumçu məhz tortsuz qalan həmin nəvədir. Baş verən təhlükəyə baxmayaraq, əlində avtomat tutan bu gənc oğlan Yaqodanın diqqətini və rəğbətini cəlb etməyə başlayır.

«Supermarketdə Çiyələk» (Jagoda u supermarketu) filmi 2003-cü ildə ekranlara çıxıb. Ekran əsərinin rejissoru Duşan Miliçdir. Almaniya, İtaliya, Yuqoslaviya və Şimali Makedoniyanın birgə istehsalı olan bu komediyada əsas rolları Branka Katiç, Srcan Todoroviç, Dubravka Miyatoviç və Danilo Lazoviç canlandırıblar.