Böyük cüdo ustası haqqında əfsanə

XIX əsrin sonlarında Yaponiyada cüdo sənəti inkişaf etməyə başlayır. Döyüş növlərini dərindən öyrənmək istəyən gənc Suqata Sansiro böyük şəhərə yollanır. O, əvvəlcə ciu-citsu məktəbinə yazılır. Lakin həmin məktəbin müəllimi cüdo ustası Şuqoro Yano üçün xaincəsinə tələ qurur və usta qarşısında biabırçı şəkildə məğlub olur. Baş verənləri öz gözləri ilə görən Sansiro Yanodan onu tələbə kimi qəbul etməsini xahiş edir.

Yeni ustad tələbələrindən təkcə fiziki güc deyil, həm də ciddi əxlaq qaydalarına tabe olmağı tələb edir. Gənclik çılğınlığı üzündən bu qaydanı pozan Sansiro müəlliminin «Öl!» əmrinə itaət edərək gölməçəyə tullanır. Bütün gecəni buz kimi suda keçirən gənc döyüşçü yalnız sübh tezdən suyun üzərində açılan lotos çiçəyini seyr edir.

«Böyük cüdo ustası haqqında əfsanə» filmi 1943-cü ildə rejissor Akira Kurosava tərəfindən çəkilib. Bu yapon dram və döyüş filmində baş rolları Denciro Okoti, Susumu Fucita, Yukiko Todoroki və Ryunosuke Tukiqata canlandırıblar.