Master

JD ləqəbli kollec müəllimi Con Durairac qeyri-adi tədris yanaşması sayəsində tələbələrin böyük rəğbətini qazanıb. Rəhbərlik və iş yoldaşları isə onun davranışlarına dözə bilmir və bu metodları bəyənmir. Con gənclərin hüquqlarını qorumaq üçün yumruqlarını işə salmaqdan çəkinmir, lakin hər günün sonunda içki aludəçiliyinə təslim olur. Tələbə şurasına seçkilər zamanı yaranan iğtişaşlardan sonra o, cəza olaraq üç aylıq müddətə azyaşlı cinayətkarlar üçün nəzərdə tutulmuş xüsusi məktəbə göndərilir.

Qapalı müəssisəyə ayaq basan Con burada dəhşətli qaydaların hökm sürdüyünü görür. Məlum olur ki, yerli cinayətkar Bxavani azyaşlı dustaqlardan öz qanunsuz planları üçün alət kimi istifadə edir. Şahidi olduğu amansız əməllərə göz yuma bilməyən qəhrəman bu quldur dəstəsinə qarşı təkbaşına mübarizəyə başlayır.

«Master» filmi 2021-ci ildə Hindistanda istehsal olunub və döyüş, triller elementlərini birləşdirir. Ekran əsərinin rejissoru Lokeş Kanaqaracdır. Baş rolları Vicay, Vicay Sethupathi, Malavika Mohanan və Arcun Das canlandırıb.