Peyk Şankar

Cəmmu və Kəşmirdə sərhəd xidməti zamanı atışmada yaralanan hindistanlı əsgər Şankar həkimlərin təyin etdiyi səkkiz günlük yataq rejimini evdə keçirmək istəyir. O, komandanlığı razı salaraq vaxtında bazaya qayıdacağına söz verir və qısa məzuniyyət alır. Əsgərin məqsədi əməliyyat olunacaq anasına baş çəkmək və xidmət yoldaşlarının ailələrinə göndərdiyi sovqatları çatdırmaqdır.

Bütün ölkəni qət edəcəyi yol elə ilk anlardan gözlənilməz hadisələrlə dolur. Yolüstü qarşılaşdığı insanların köməyinə çatan Şankar xeyirxahlığı ucbatından qatarını qaçırır. Beləliklə, anasına vaxtında yetişmək və verdiyi hərbi sözü tutmaq onun üçün çətin sınağa çevrilir.

2019-cu ildə çəkilmiş «Peyk Şankar» döyüş dramının rejissoru İrfan Kamaldır. Hindistan istehsalı olan bu ekran əsərində baş rolları Surac Pançoli, Anil Reci, Saurabh Anyihotri və Meqha Akaş canlandırıblar.