Saat X

Xüsusi xidmət orqanları təhlükəli terrorçu Cambalın hazırladığı genişmiqyaslı hücum planı barədə məlumat əldə edir. Cinayətkarın JEET kod adlı bu təxribatı həyata keçirmək üçün seçdiyi tarix mayın 10-na təyin olunub. Hadisələr mayın 4-də başladığı üçün təhlükənin qarşısını almağa cəmi bir neçə gün qalır.

Əməliyyatın rəhbəri olan Sidhant tabeliyindəki mütəxəssislərlə birlikdə hərəkətə keçir. Bu çətin tapşırıqda ona qardaşı Şaşank, komanda üzvləri Aditya və Aditi ilə yanaşı, kanadalı polis əməkdaşı Den də kömək edir. Onlar vaxt bitənə qədər terrorçunun planlarını pozmaq üçün bütün qüvvələrini səfərbər edirlər.

«Saat X» (Dus) filmi 2005-ci ildə Hindistanda çəkilib və döyüş, triller janrlarını birləşdirir. Ekran əsərinin rejissoru Anubhav Sinhadır, əsas rolları isə Sancay Datt, Sunil Şetti, Abhişek Baççan və Zeyed Xan canlandırıblar.