Yura Dövrünün Parkı

Varlı bir alim Kosta-Rika sahillərindəki adada qeyri-adi bir məkan quraraq iki paleontoloqu ora dəvət edir. Qədim ağcaqanad qalığından əldə edilən qan nümunələri sayəsində nəsli kəsilmiş dinozavrlar yenidən həyata qaytarılıb. Alim bu nəhəng canlıları tezliklə açılacaq əyləncə məkanının əsas hissəsinə çevirməyi planlaşdırır.

Açılışa sayılı günlər qalmış alimin nəvələri və dəvət olunmuş mütəxəssislər adada sınaq gəzintisinə çıxırlar. Lakin işçilərdən birinin qiymətli embrionları oğurlamaq cəhdi və eyni vaxtda başlayan fırtına bütün təhlükəsizlik sistemlərini sıradan çıxarır. Elektrik enerjisinin kəsilməsi ilə qoruyucu çəpərlər açılır və nəzarətsiz qalan yırtıcılar sərbəst dolaşmağa başlayır.

1993-cü il istehsalı olan bu fantastik döyüş filmini rejissor Stiven Spilberq ABŞ-da lentə alıb. Ekran əsərinin baş rollarında Sem Nil, Lora Dern, Ceff Qoldblum və Riçard Attenboro çəkiliblər. Bu film eyniadlı məşhur franşizanın ilk hissəsidir.