Heyvan

Kaskadyor Mişel Qoşe dözülməz xasiyyəti ucbatından kinostudiyaların qapısından geri qaytarılır. Üstəlik, sevgilisi də onunla evlənməkdən son anda imtina etmək ərəfəsindədir. Lakin məşhur ulduz Bruno Ferrarinin növbəti layihə üçün Parisə gəlişi işləri tamamilə dəyişir.

Aktyorun yeni filmində çoxlu sayda mürəkkəb və təhlükəli tryuklar var və bunları Mişeldən başqa heç kim edə bilməz. Ən maraqlısı isə odur ki, şıltaq kino ulduzu ilə cəsur kaskadyor bir-birinə əkiz qardaş qədər bənzəyirlər. Qoşe bu bənzərlikdən istifadə edərək yenidən çəkiliş meydançasına qayıtmaq imkanı qazanır.

1977-ci ildə ekranlara çıxan «Heyvan» filminin rejissoru Klod Zididir. Fransız komediyasında əsas rolları Jan-Pol Belmondo, Rekel Uelç, Şarl Jerar və Jülyen Qiomar canlandırıblar.