Paisa Vasool

Bob Marli ləqəbli cinayətkar qruplaşma rəhbəri Portuqaliyada gizlənərək Heydərabad şəhərindəki qanunsuz şəbəkəni uzaqdan idarə edir. Qanuni yollarla mafiyanı dayandıra bilməyən xüsusi xidmət orqanları sindikatı daxildən məhv etmək üçün təhlükəli plan qururlar. Bu gizli tapşırıq üçün həbsdən yenicə çıxmış, çılğın xarakterli Teda Sinqh seçilir.

Şərtlərlə razılaşan Teda həm asayiş keşikçiləri, həm də quldurlar arasında təhlükəli oyuna başlayır. Hadisələrin gedişində o, Harika adlı qızla tanış olur. Harikanın jurnalist bacısı bir müddət əvvəl Marli haqqında araşdırma aparmaq üçün Portuqaliyaya getmiş və orada yoxa çıxmışdır.

2017-ci ildə Hindistanda istehsal olunmuş «Paisa Vasool» filminin rejissoru Puri Caqannathdır. Ekran əsərində baş rolları Nandamuri Balakrişna, Şriya Saran, Vikramcit Virk və Musskan Sethi canlandırıblar.