Saagasam

İşsiz olan Ravi iti ağlı və analitik düşüncəsi ilə seçilsə də, atasının tənqidlərinə baxmayaraq asan yolla varlanmaq arzusundadır. Tez bir zamanda böyük məbləğdə pul qazanacağına dair atası ilə mərcə girən gənc gizli mərc oyunlarında iştirak etmək qərarına gəlir. Təsadüfən Bittu adlı təhlükəli cinayətkarla qarşılaşan Ravi qanunsuz mərc məkanının yerini öyrənir, lakin həmin ünvana qəfil polis basqını təşkil edilir.

Digər iştirakçılarla birlikdə nəzarət altına alınan Ravi ətrafdakı faktları təhlil edərək Bittunun dəstəsi ilə birlikdə böyük bank soyğunu planlaşdırdığını üzə çıxarır. Gəncin məsələyə müdaxiləsi cinayətkarların planlarını tamamilə alt-üst edir. Nəticədə Ravi bu hiyləgər və nüfuzlu quldurbaşı ilə üz-üzə qalır və onun intiqam hədəfinə çevrilir.

Hindistan istehsalı olan «Saagasam» döyüş filmi 2016-cı ildə işıq üzü görüb. Ekran əsərinin quruluşçu rejissoru Arun Raj Varmadır, əsas rolları isə Praşanth, Amanda Rosario, Sonu Sud və Abeetha canlandırıblar.