Kisna: Sevginin müdafiəsində...

Hadisələr 1930-cu illərdə, Hindistanın Britaniya hakimiyyətindən xilas olmaq üçün azadlıq mübarizəsinə qalxdığı gərgin bir dövrdə cərəyan edir. Kisna adlı yerli gənc Ketrin adlı ingilis qızını hiddətlənmiş kütlənin hücumundan xilas edir. Qisas almaq istəyən etirazçıların arasında onun doğma əmisi və qardaşı da yer alır.

Ketrin amansız bir kral məmuru olan atasının əməllərinə görə hədəf seçilmişdir. Kisna onu gəmi ilə ölkəsinə göndərə biləcək Yeni Dehlidəki Britaniya nümayəndəliyinə sağ-salamat çatdırmağı öz üzərinə götürür. Birlikdə çıxdıqları bu keşməkeşli səfər zamanı gənclər arasında hisslər yaranır, lakin mövcud öhdəliklər onların yolunu kəsir.

2005-ci il istehsalı olan bu Hindistan melodramına Subhaş Qhay rejissorluq etmişdir. Filmdə əsas obrazları Vivek Oberoy, Antoniya Bernat, İşa Şarvani və Suşmita Sen canlandırmışlar.