Ek Pal

Gənclərin sevgi macərası nikahla nəticələnmir. Qız başqa bir şəxslə ailə qurur, onun keçmiş sevgilisi isə hətta gəlin taxt-rəvanını yeni bəyin evinə daşımağa kömək edir. Aradan bir neçə il keçir, ailə həyatı xoşbəxt görünsə də, cütlüyün övladı dünyaya gəlmir.

Ərinin uzunmüddətli ezamiyyətə yollanması hadisələrin gedişatını dəyişir. Tək qalan qadın təsadüfən keçmiş sevgilisi ilə rastlaşır və onlar gecəni birlikdə keçirirlər. Hamilə qaldığını anlayan qadın bu həqiqəti həyat yoldaşına açıb-açmamaq barədə tərəddüd edir. Qonşu kənddə yaşayan yaşlı kişinin sırf xəyanət şübhəsinə görə öz körpəsini öldürdüyünü görən qadın evi tərk etmək qərarına gəlir.

«Ek Pal» adlı Hindistan dram filmi 1989-cu ildə rejissor Kalpana Lazmi tərəfindən ekranlaşdırılıb. Əsas rolları Şabana Azmi, Nasiruddin Şah, Faruk Şayx və Şriram Laqu canlandırıblar.