Sati

Hadisələr 1828-ci ildə, dul qadınların diri-diri yandırılması ayininin qadağan olunmasından bir il əvvəl Hindistan kəndlərinin birində cərəyan edir. Əmisinin evində sığınacaq tapan lal və yetim Umi anasını doğuş zamanı, nişanlısını isə toydan dərhal əvvəl itirib. Qaydalara görə o ərə getməyənə qədər ögey bacısı Şaşinin də ailə qurmaq hüququ yoxdur, bu səbəbdən qohumları ona ər axtarışına çıxır.

Verilən fala görə Uminin taleyinə dul qalmaq və həyat yoldaşının meyiti ilə birgə tonqalda yanmaq yazılıb. Ailə əvvəlcə nəsli şərəfləndirmək naminə onu qoca bir kişi ilə evləndirmək istəsə də, bu plan baş tutmur. Çıxılmaz vəziyyətdə qalan kənd camaatı və qohumlar qəribə bir çıxış yolu taparaq lal qızı nəhəng bir ağacla evləndirməyə qərar verirlər.

«Sati» adlı dram filmi 1989-cu ildə rejissor Aparna Sen tərəfindən Hindistanda lentə alınıb. Baş rolları Şabana Azmi, Arun Bannerci, Kali Bannerci və Pradip Maherci ifa ediblər.