Miqrantlar

Moskva restoranlarının birində yad şəhərə yeni gəlmiş iki gəncin təsadüfi tanışlığı baş verir. İlk söhbət zamanı hər ikisi qarşı tərəf haqqında yalan təsəvvürə qapılır. Qız oğlanın yerli paytaxt sakini olduğunu zənn edir, oğlan isə yeni tanışını yüngül həyat tərzi sürən qadın hesab edir.

Yaranmış anlaşılmazlıq hər ikisinin polis şöbəsinə düşməsindən sonra aradan qalxır. Şəxsiyyəti və daimi yaşayış yeri olmayan şəxslər qismində saxlanılan gənclər eyni çətinliklə üzləşir və bu hadisə onları bir-birinə yaxınlaşdırır.

«Migranty» adlı sovet dram filmi 1991-ci ildə ekranlara çıxıb. Ekran əsərinin quruluşçu rejissoru Valeri Priyomıxovdur, baş rollarda isə Oksana Arbuzova, Denis Karasyov, Nina Ruslanova və İrina Klimova çəkiliblər.