Mamaroş

Mamasının balası mənasını verən Mamaroş ləqəbli belqradlı kinomexanik Pera İliç anası ilə birgə dinc ömür sürür. O, işlədiyi kinoteatrda tamaşaçılara Aleksandrovun «Şən uşaqlar»ı kimi köhnə lentləri nümayiş etdirməkdən zövq alır. Lakin «Mərhəmət mələyi» əməliyyatı çərçivəsində Belqradın bombalanması onların sakit günlərinə son qoyur.

Təhlükədən qurtulmaq məqsədilə Pera və anası Nyu-Yorka qaçmaq məcburiyyətində qalırlar. Özü ilə apardığı filmi Amerikada göstərmək və anasının bişirdiyi kolbasalı lobya şorbasını yemək imkanı olsa da, doğma yurdunun ab-havası onun yaddaşından silinmir. Pera pravoslavlıq, sosializm və qaraçı xaosundan yoğrulmuş Serbiyanı öz qəlbində uzaq sahillərə daşıyır.

2013-cü il istehsalı olan «Mamaros» filmi Almaniya, Serbiya və Macarıstan kinematoqrafçılarının ortaq layihəsidir. Ekran əsərinin quruluşçu rejissoru Momçilo Mrdakoviçdir. Əsas obrazları Boqdan Dikliç, Mira Banyaç, Branko Vidakoviç və Anita Mançiç canlandırıblar.