Qartal rəqsi

Evə qayıtması şərəfinə ailəsi ilə birgə süfrə arxasına əyləşən gənc Temir televizorda maraqlı bir yarışa baxır. Ekranda Tuvanın ən güclü pəhləvanlarının milli güləş üzrə yarışları nümayiş etdirilir. Turnirin qalibinə təqdim ediləcək əsas mükafatı görəndə gənc heyrətə gəlir, çünki bu mükafat onun öz atı Ağyal idi.

Sevimli atını itirmək istəməyən Temir dərhal şəhərə getmək qərarına gəlir. O, nəyin bahasına olursa-olsun heyvanı geri qaytarmaq niyyətindədir. Qarşısına qoyduğu bu məqsədə çatmaq üçün gənc hətta turnirin çempionu ilə döşəkdə qarşılaşmağa da hazırdır.

Tuva gənclərinin həyatından bəhs edən «Qartal rəqsi» filmi 1975-ci ildə SSRİ-də lentə alınıb. Dram janrında çəkilmiş ekran əsərinin quruluşçu rejissoru Viktor Jivolubdur, baş rollarda isə Çoro Dumanayev, Nurmuxan Janturin, R. Biri-Sanaa və L. Çimit çıxış edirlər.