Una

Jurnalistika fakültəsinin gənc tələbəsi Una tələbə qəzeti üçün kütləvi informasiya kafedrasının professoru Mişel Babiçdən müsahibə almaq qərarına gəlir. Mühazirələri böyük maraqla dinlənilən, beynəlxalq konfranslara dəvət alan və kitabları nəşr olunan Babiç olduqca nüfuzlu alimdir. Lakin onun cəmiyyət və sosiologiya ilə bağlı radikal yanaşmaları universitetin rəhbər dairələrində ciddi narazılıq doğurur.

Fakültənin dekan müavini Unaya bir sövdələşmə irəli sürür: qız müsahibədən istifadə edərək professor haqqında kompromat toplamalı, bunun müqabilində isə həbsdəki sevgilisinin vaxtından əvvəl azadlığa çıxması təmin edilməlidir. Una bu təkliflə razılaşsa da, bir neçə görüşdən sonra professor ona aşiq olur və qız üçün seçim etmək getdikcə mürəkkəbləşir.

1984-cü ildə ekranlara çıxan «Una» filmi Yuqoslaviya istehsalı olan dram və melodram janrındadır. Ekran əsərinin quruluşçu rejissoru Miloş Radivoyeviçdir, əsas obrazları isə Sonya Saviç, Rade Şerbeciya və Milena Draviç canlandırıblar.