Dəlilik

1857–1859-cu illərdə Hindistanda baş qaldıran sipahi üsyanı kiçik bir şəhəri də ağuşuna alır. Dini inancları təhqir edən donuz və mal piyi ilə yağlanmış patronlara etiraz edən əsgərlərə ingilislərdən xilas olmaq istəyən yerli knyazlıqlar qoşulur. Britaniya ağalığına qarşı çıxan müsəlman elitasının önündə isə Sərfəraz Xan dayanır. Bu qarışıqlıqda lord Labadurun ailəsindən olan üç qadın yerli sələmçinin evində gizlənsə də, xəbər tezliklə yayılır.

İngilis qadınlar puştun Cavid Xanın evinə gətirilir və onları labüd ölümdən Cavidin gənc Ruta bəslədiyi gözlənilməz hisslər xilas edir. Xan onu ikinci arvadı etmək qərarına gəldikdə, Rutun anası Məryəm və Cavidin həyat yoldaşı Firdovs bu izdivaca qəti şəkildə qarşı çıxır. Ehtirasının arxasınca gedən Cavid heç kimə qulaq asmır, Məryəm isə qızını qorumaq üçün inadkar bir mübarizəyə başlayır.

1979-cu ildə çəkilmiş «Junoon» dramının quruluşçu rejissoru Şyam Beneqaldır. Ekran əsərində əsas rolları Şaşi Kapur, Nəfizə Əli, Şabana Azmi və Nəsirəddin Şah canlandırıblar.