Ester Kan

XIX əsr, London şəhəri. Ester yoxsul və çoxuşaqlı yəhudi ailəsində böyüyür. Uşaqlıqdan bəri bacı və qardaşlarından fərqlənən bu qız qapalı xasiyyətə malikdir və heç vaxt başqalarının fikri ilə razılaşmır. Günlərin birində teatr tamaşasından sonra hamının bəyəndiyi baş rol ifaçısını açıq şəkildə tənqid edir və buna görə yaxınları tərəfindən yenidən qəribə biri kimi qarşılanır.

Bir müddət sonra Ester teatra gedərək aktrisa olmaq istədiyini bildirir. Təcrübəli yaşlı aktyor Neyten ona səhnə sənətinin sirlərini öyrətməyə başlayır və gənc qız tezliklə ilk uğurlarını qazanır. Lakin həqiqi sənətkara çevrilmək və personajların daxili aləmini tam duymaq üçün sadəcə dərslər kifayət etmir, müəyyən həyat təcrübəsi toplamaq tələb olunur.

«Esther Kahn» dram filmi fransız rejissoru Arno Depleşen tərəfindən çəkilib. Böyük Britaniya və Fransanın birgə istehsalı olan ekran əsəri 2000-ci ildə nümayiş olunub. Filmdə əsas obrazları Sammer Feniks, İan Holm, Fabris Depleşen və Əkbər Kurta canlandırıblar.