Oğlan

On yaşlı uşaq valideynləri və üç yaşlı qardaşı ilə birlikdə Yaponiya boyu səyahət edir. Müharibədə yaralandığını əsas gətirən ata özünü əlil sayır və iş axtarmaqdan boyun qaçırır. Dolana bilməyən ailə qanunsuz yolla pul qazanmaq qərarına gəlir.

Onların qurduğu hiylə yol qəzalarını saxtalaşdırmaqdan ibarətdir. Əvvəlcə ana, daha sonra isə böyük oğul avtomobillərin altına atılaraq zərbə almış kimi davranır. Polislə problem yaşamaq istəməyən sürücülər isə hadisə yerindəcə onlara pul təzminatı ödəməyə razı olur.

«Shônen» dram filmi 1969-cu ildə yapon rejissoru Nagisa Oshima tərəfindən çəkilib. Baş rolları Fumio Watanabe, Akiko Koyama, Tetsuo Abe və Tsuyoshi Kinoshita ifa ediblər.