Oyuncaq

Hindistan istehsalı olan «Khilona» («Oyuncaq») dram filmi Thakur Surac Sinqhin ailəsində baş verən hadisələri əks etdirir. Evin ortancıl oğlu, şair Vicay sevgilisi Sapnanın qonşuları Bihari ilə məcburi evliliyindən sonra ağlını itirir. Toy gecəsi Sapnanın sevgilisinin gözləri önündə intihar etməsi gəncin psixikasını tamamilə sarsıdır. Oğlunu ruhi xəstəxanaya yerləşdirmək istəməyən ata çarəni başqa yolda görür.

Ailə gəncin sağalmasına kömək etməsi üçün Çanda adlı gənc qadını evə gətirir. Qadının qayğısı sayəsində Vicayın vəziyyəti tədricən yaxşılaşsa da, o, bir gecə Çandaya qarşı zorakılıq edir. Evin digər üzvləri Çandaya nifrətlə yanaşır, həmçinin kiçik qardaş Mohan və qonşu Bihari onu təqib etməyə başlayırlar. Sağaldıqdan sonra Vicay keçmişi xatırlamır və hamilə qalan Çanda evdən qovulur.

Melodram və musiqili janrda çəkilmiş bu ekran əsəri 1970-ci ildə tamaşaçılara təqdim olunub. Filmin rejissoru Çander Vohradır. Əsas obrazları Sanciv Kumar, Mumtaz, Durqa Xote və Bipin Qupta canlandırıblar.