Ayna

«Ayna» filmi 1920-ci illərin sonunda kolxoz quruculuğunun başladığı Türkmənistan kəndlərindən bəhs edir. Varlı Əsən bayın yanında muzdurluq edən gənc Ayna kənddəki yeniliklərlə yaxından maraqlanır. Bay gözlənilmədən qıza kolxoza daxil olmağı və komsomolçularla əlaqə qurmağı tapşırır. Rayona gedən yolda Aynaya və onun yeni yoldaşlarına basmaçılar hücum etsə də, kommunist Tahırov vaxtında köməyə çataraq onları ölümdən xilas edir və qız komsomol sıralarına qoşulur.

Sovet hakimiyyətinə nifrət bəsləyən Əsən bay basmaçılarla əlbir olaraq təşəbbüskar, lakin şöhrətpərəst kolxoz sədri Xocomu öz tərəfinə çəkməyə çalışır və onu Ayna ilə evləndirəcəyini vəd edir. Bay Xocomdan yaxınlıqdakı quyuları zəhərləməyi tələb edir. Basmaçıların mal-qaranı tələf etmək, bəndi partlatmaq və sürüləri ilə birlikdə sərhəddən qaçmaq planını təsadüfən öyrənən Ayna dərhal Tahırova xəbər verir.

Tarixi dram janrında çəkilən filmin quruluşçu rejissorları Altı Qarlıyev və Vladimir İvanovdur. Baş rolları Antonina Rüstəmova, Altı Qarlıyev, Artık Cıllıye və Gülkeşi Qulmuradov canlandırıblar. Ekran əsəri 1960-cı ildə SSRİ-də istehsal olunub.