QULAQ

Amerikalı telejurnalist Mikki Almon idman yarışlarını işıqlandırmaq məqsədilə Moskvaya gəlir. Yerli alimlərdən birinin gizli məlumatları ölkədən çıxarmaq xahişi KQB əməkdaşlarının müdaxiləsi ilə nəticələnir. Günlərlə davam edən dindirmələrdən sonra müstəntiq Bukovski onu ABŞ xeyrinə casusluq etdiyini etiraf etməyə məcbur edir. Azadlıq vədinə baxmayaraq, jurnalist qatara mindirilərək şimala göndərilir.

Almon Qütb dairəsinə yaxın ərazidə yerləşən əmək düşərgəsində digər siyasi məhbusların sırasına düşür. Burada o, yerli qaydaları yaxşı bilən kinayəli bir ingilislə tanış olur və ondan dözülməz şəraitdə sağ qalmağın yollarını öyrənir. Ağır zəhmətin onları ölümə apardığını anlayan hər iki məhbus Norveç istiqamətinə qaçış planı hazırlamağa qərar verir.

1984-cü il istehsalı olan «QULAQ» («Gulag») dram filminin quruluşçu rejissoru Rocer Yanqdır. Ekran əsərində Devid Kit, Malkolm Makdauell, Devid Suşe və Uorren Klark kimi aktyorlar çəkiliblər.