Kosmosda hisslər yoxdur

Asperger sindromundan əziyyət çəkən on səkkiz yaşlı Simonun rahatlığı üçün ətrafında dəqiq bir intizam olmalıdır. Gündəlik rejimin dəqiqliyi, qidalanma saatları və geyimlərin qaydası onun üçün böyük əhəmiyyət kəsb edir. Gəncin qayğısına qalan böyük qardaşı Sem sevgilisindən ayrıldıqdan sonra Simonun qurduğu bu nizam sarsılır.

Qardaşının dərin kədərə qapılması Simonun sabit həyatını xaosa sürükləyir. Əvvəlki rahatlığına qayıtmağın yeganə yolunu Semin yenidən xoşbəxt olmasında görən gənc dərhal hərəkətə keçir. O, qardaşına yeni bir həyat yoldaşı tapmağı qarşısına məqsəd qoyur.

«Kosmosda hisslər yoxdur» (I rymden finns inga känslor) adlı İsveç filmi 2010-cu ildə rejissor Andreas Ohman tərəfindən çəkilib. Komediya və dram janrındakı ekran əsərində baş rolları Bill Skarsqard, Martin Valstryom, Sesiliya Forss və Sofi Hemilton canlandırırlar.