Mən, Cilda

Gecə klubunun sahibi və cinayətkar qruplaşmanın rəhbəri Maks keçmişin məşhur aktrisası Rita Heyvortun xəyalı ilə yaşayır. Klubun şərikli idarəçisi Lulu bura yeni rəqqasə gətirir. Cilda adlı bu gənc qadın Maksın valeh olduğu kino ulduzuna heyrətamiz dərəcədə bənzəyir. Klub rəhbəri qıza dərhal aşiq olur, lakin onun əsl niyyətindən xəbərsiz qalır.

Əslində Cilda bacısının müəmmalı ölümünün səbəblərini üzə çıxarmaq üçün klubda işə düzəlib. Qız və ona kömək edən Lulu bu hadisədə Maksın əli olduğuna inansalar da, əsl qatili gecə klubunun ziyarətçiləri arasında axtarırlar. Eyni zamanda Maksın işə götürdüyü yeni şəxsi sürücü Aleks də müdirinin yeni sevgilisinə qarşı biganə qala bilmir.

«Mən, Cilda» dram filmini 1989-cu ildə italiyalı rejissor Andrea Byanki lentə alıb. Əsas rollarda Pamela Prati, Cerardo Amato, Valentin Demi və Qreys Vernon çəkiliblər.