Vəhşi hekayələr

Təyyarə sərnişinləri gözlənilmədən öyrənirlər ki, onların hamısını Qabriel Pasternak adlı şəxslə keçmiş münasibətlər bağlayır: keçmiş sevgili, musiqi müəllimi və diş həkimi vaxtilə onun xətrinə dəyiblər. Eyni zamanda yol kənarındakı kiçik kafedə ofisiant qız atasının ölümünə səbəb olmuş sələmçini tanıyır, aşpaz qadın isə qisas almaq üçün siçan zəhərindən istifadə etməyi təklif edir.

Başqa bir hadisə isə kimsəsiz magistral yolda baş verir. Bahalı avtomobil sürən şəhərli sürücü köhnə maşını ötmək istəyərkən digər sürücünün inadkarlığı ilə qarşılaşır və bu mənasız yarış tezliklə qanlı qarşıdurmaya çevrilir.

«Relatos salvajes» filmi dram, komediya və triller janrlarını bir araya gətirir. 2014-cü ildə Argentina, İspaniya, Fransa və Böyük Britaniyanın birgə istehsalı ilə ərsəyə gələn filmin rejissoru Damian Sifrondur, əsas rolları isə Rikardo Darin, Oskar Martines və Leonardo Sbaralya canlandırıb.